(عمران اسحاق)
آج میری لائبریری کی الماری میں خوب صورت ، پرکشش اور پرتاثیر کتاب کا اضافہ ہوا ، یہ ایک ایسی روحانی کتاب ہے جو صرف کاغذوں کا مجموعہ نہیں بلکہ جذبوں کی داستان، ایمان کی روانی، اور روح کی گہرائیوں تک اتر جانے والا سفرنامہ ہے۔ یہ وہ بیش قیمت تحفہ ہے جو آپ نے میرے یومِ پیدائش پر اپنی محبت کے ساتھ روانہ کیا — ” حاضر اللّٰہ سائیں”۔ محترم ارشد ملک صاحب، آپ کے قلم کی یہ خوبصورتی، الفاظ کی یہ چاشنی، اور حج کے مقدس سفر کی یہ انتہائی پُرکشش تصویر کشی دیکھ کر میں آپ کے سامنے ادب سے جھک جاتا ہوں۔
ارشد ملک صرف ایک ادیب ہی نہیں، بلکہ الفاظ کے جادوگر ہیں جو قاری کو کہانی کے پرتوں میں چھپے نور تک لے جاتے ہیں۔ رومیل پبلیشرز کے تحت آپ کا یہ سفر نامہ شائع جو حج کے موضوع پر آپ کا یہ شاہکار، نہ صرف علم کا خزینہ ہے بلکہ دل کو چھو لینے والی روحانی کیفیت سے بھرپور ہے۔ فیس بک پر آپ کی تحریروں کی لڑیوں میں گم ہونا، آپ کی گفتگو کے موتی چننا، اور پھر یہ کتاب ہاتھ میں پا کر اسے اپنی لائبریری کا حصہ بنانا — یہ سب میرے لیے ایک اعزاز کی بات ہے۔
خاص طور پر اس لیے کہ اگلے کچھ ماہ بعد حج کے مقدس ایام شروع ہونے والے ہیں، اور میں نے ٹھان لی ہے کہ ان مبارک لمحات میں آپ کے سفرنامے کو توجہ سے پڑھوں گا۔ جس طرح آپ نے منٰی کے صحراؤں، عرفات کی دعاؤں، اور خانہ کعبہ کی نورانی گھڑیوں کو الفاظ کا لباس پہنایا ہے، اُسے پڑھتے ہوئے مجھے یقین ہے کہ میں ان برکتوں کو محسوس کروں گا، گویا میں خود اُس مقدس زمین پر کھڑا ہوں۔
ارشد صاحب! یہ کتاب صرف کاغذی صفحات نہیں، بلکہ آپ کے دل کی دھڑکن ہے جو آپ نے ہم جیسے قارئین کے لیے وقف کر دی۔ میں آپ کا دل سے شکر گزار ہوں کہ آپ نے نہ صرف میری لائبریری کو قیمتی بنایا، بلکہ میرے دل کو ایک ایسی روحانی مسرت سے نوازا جو الفاظ سے ماورا ہے۔ اللہ تعالیٰ آپ کے قلم کو مزید جلا عطا فرمائے، آپ کی تخلیقات کو قبولیت کا درجہ دے، اور آپ کے ہر سفر کو ایمان کی روشنی سے منور کرے۔ آمین!
