پاکستان میں مقیم افغان مہاجرین کو افغانستان واپس بھجوایاجارہاہے اوراس بارے میں مختلف خبریں اور ویڈیوز سوشل میڈیا پر گردش کرتی دکھائی دیتی ہیں۔
چندروزقبل ایک ویڈیو سوشل میڈیا پر وائرل ہوئی جس کے بارے میں یہ دعویٰ کیا گیا کہ پاکستان سے بے دخل کیے جانے والے کسی افغان کاروباری شخص کی دکان سے پنجاب کے شہری سامان لوٹ رہے ہیں۔ اسے شیئر کرنے والے صارفین کا دعویٰ ہے کہ پاکستان سے بے دخل ہونے والے افغان تاجر کی دکان سے سامان لوٹا جا رہا ہے۔اب اصل معاملہ ہے کیا؟ایک ویب سائٹ اردو نیوزنے اس پر تحقیق کی ہے اور اپنی رپورٹ میں کہاہے کہ یہ وائرل ویڈیو شفیق احمد نامی ٹک ٹاک صارف کی جانب سے 21 مارچ 2025 کو شیئر کی گئی تھی۔ویڈیو میں شور شرابے میں لوگوں کو کپڑوں کے بنڈل سمیٹتے ہوئے دیکھا جا سکتا ہے تاہم اس میں کسی بھی قسم کی بات چیت یا تبصرہ نہیں ہے اور نہ ہی کیپشن میں ویڈیو کے حوالے سے کوئی تفصیل لکھی گئی ہے۔سوشل میڈیا پر ویڈیو کے وائرل ہونے کے بعد اب شفیق احمد نے ایک اور ویڈیو جاری کی ہے جس میں انہوں نے وائرل ویڈیو سے متعلق ان دعوؤں کو مسترد کرتے ہوئے وضاحت جاری کی ہے۔
اس ویڈیو میں وہ کہتے ہیں کہ ’میری وائرل ہونے والی فیس بک ویڈیو پر کسی نے لکھا ہے کہ افغانوں کا مال پنجابی لوٹ رہے ہیں، یہ سارے دعوے جھوٹے ہیں۔وائرل ویڈیو اعظم مارکیٹ لاہور کی ایک دکان کی ہے جس کا نام یحییٰ، ذکریہ اینڈ سجاد فیشن ہاؤس ہے، یہاں سٹار کولیکشن کا مال ہوتا ہے، یہاں عید کے دنوں میں تھوڑا زیادہ رش تھا، لیکن روزانہ کی بنیاد پر اتنا ہی مال بیچا جاتا ہے، وائرل ویڈیو کے متعلق کیے جانے والے سارے دعوے غلط ہیں، لوگ کسی بھی ویڈیو پر کچھ بھی لکھ کر شیئر کر دیتے ہیں۔
یوں شفیق احمدکی وضاحت کے بعداس وائرل ویڈیوکی اصل حقیقت لوگوں کے سامنے آئی ہے۔
