آرمی چیف جنرل عاصم منیر نےکہاہے کہ پاکستان کی معدنیات کی دولت کو اخذ کرنے کے لیے انجینیئر ، جیالوجسٹ، آپریٹر اور بہت سے ماہرکان کن درکار ہیں اسی لیے ہم اس شعبے کی ترقی کے لیے طلبا کو بیرون ملک تربیت کے لیے بھی بھیج رہے ہیں، اس وقت بلوچستان کے27 طلبا زیمبیا اور ارجنٹینا میں منرل ایکسپلوریشن میں تربیت حاصل کر رہے ہیں، ہمارا مقصد معدنی شعبےکے لیے افرادی قوت، مہارت اور انسانی وسائل پیدا کرنا بھی ہے۔ان کاکہناتھاکہ ہمارے پاس کھربوں ڈالرز کے ذخائر ہیں۔
جنرل عاصم منیر کا کہنا تھا کہ اقتصادی سلامتی، قومی سلامتی کے ایک اہم جُزو کے طور پر ابھری ہے، پاک فوج اپنے شراکت داروں اور سرمایہ کاروں کے مفادات اور اعتماد کے تحفظ کے لیے ایک مضبوط سکیورٹی فریم ورک اور فعال اقدامات کو یقینی بنائےگی، ملک میں اپ اسٹریم اور ڈاؤن اسٹریم معدنی صنعتوں کی ترقی کو بھی یقینی بنایا جائےگا۔چیف جنرل عاصم منیرکا کہنا تھاکہ انہیں پختہ یقین ہےکہ پاکستان عالمی معدنی معیشت میں ایک رہنما کے طور پر ابھرنےکے لیے تیار ہے، پاکستانی عوام کے پیروں کے نیچے وسیع معدنی ذخائر ہوتے ہوئے مایوسی اور بے عملی کی کوئی گنجائش نہیں۔
آرمی چیف اسلام آباد میں پاکستان منرل انویسٹمنٹ فورم 2025 سے خطاب کررہے تھے۔ آرمی چیف جنرل عاصم منیر کا کہنا تھا کہ ہم بین الاقوامی اداروں کو خوش آمدید کہتے ہیں کہ وہ اپنی مہارت سے پاکستان کو روشناس کرائیں، سرمایہ کاری کے مواقع تلاش کریں اور وسائل کی وسیع صلاحیت کی ترقی میں ہمارے ساتھ شراکت داری کریں۔
