سندھ کے سینئرصوبائی وزیرشرجیل انعام میمن نے کہاہے کہ سندھ بھر میں غیر قانونی افغان تارکین وطن کے خلاف کارروائیاں جاری ہیں اور 307 افراد کو امین ہاؤس ٹرانزٹ کیمپ سے ملک بدر کیا گیاہے۔ابتدائی طور پر 313 افراد کی فہرست مرتب کی گئی،جانچ پڑتال اور تصدیق کے بعد 307 افراد کو قانونی کارروائی مکمل کرنے کے بعد افغانستان واپس بھیج دیا گیا ہے۔ملک بدر کیے جانے والوں میں 79 بچے، 37 خواتین اور 191 مرد شامل ہیں۔شرجیل انعام میمن نے کہاہے کہ افغان شہریوں کو اس لئے ڈی پورٹ کیا جا رہا ہے کیونکہ وہ غیر قانونی طور پر ملک میں مقیم تھے۔شرجیل انعام میمن کاکہناتھاکہ غیر قانونی تارکین وطن کے انخلا کی مہم جاری رہے گی، عالمی قوانین اور ضابطوں پر عمل درآمد کیا جا رہا ہے۔
