عوام جانتے ہیں کہ آئی ایم ایف پروگرام رکوانے کے لیے خطوط لکھے گئے۔عطاءاللہ تارڑکاتقریب سے خطاب

وفاقی وزیر اطلاعات و نشریات عطا اللہ تارڑ نے این اے 127 میں تقریب سے خطاب کرتے ہوئے کہا ہے کہ عوام کو ریلیف کی فراہمی کے لیے سخت محنت کی ہے اسی بدولت ہمیں کامیابی ملی ہے ،عوام کو ریلیف دینے کے لیے نعروں کے بجائے عملی اقدامات کر رہے ہیں۔ انہوں نے کہا کہ عالمی سطح پر پاکستان کی معاشی میدان میں کارکردگی کا اعتراف ہو رہا ہے بجلی سستی مہنگائی سنگل ڈیجٹ پر اور سٹاک مارکیٹ بلندیوں کو چھو رہی ہے۔ عطاءاللہ تارڑ نے کہا کہ تمام معاشی اشاریے عکاسی کرتے ہیں کہ پاکستان اڑان بھر چکا ہے، اڑان پاکستان کے تحت وطن عزیز معاشی ترقی کی بلندیوں کو چھوئے گا۔ انہوں نے کہا کہ صنعتی صارفین کے لیے بھی سات روپے 69 پیسے فی یونٹ بجلی سستی ہوئی ہے۔سستی بجلی سے معاشی سرگرمیاں بڑھیں گی اور روزگار کے مواقع پیدا ہوں گے ۔انہوں نے کہا کہ عوام ہماری طاقت ہیں عوامی حمایت سے ہی مشکل اور درست فیصلے کرنے میں کامیابی ملی ہے۔ ان کا کہنا تھا کہ ارادے مضبوط اور نیت ٹھیک ہو تو اللہ تعالی بھی مدد کرتا ہے۔ ہم نے حکومت سنبھالی تو ملک کو بہت سے چیلنج درپیش تھے کچھ عناصر نے سیاسی مفاد کے لیے ملکی مفادات کو داؤ پر لگایا۔ عوام جانتے ہیں کہ آئی ایم ایف پروگرام رکوانے کے لیے خطوط لکھے گئے۔ مشکل وقت میں وزیراعظم شہباز شریف نے سیاست نہیں ریاست کا نعرہ لگایا۔