وزیراعلیٰ پنجاب مریم نواز شریف کی زیر صدارت ایک خصوصی اجلاس منعقد ہوا جس میں آسان کاروبار فنانس اور آسان کاروبار کارڈ منصوبوں پر پیشرفت کا جائزہ لیا گیا،وزیراعلیٰ مریم نواز شریف نے آسان کاروبار فنانس اور آسان کاروبار کارڈ سکیم کو آسان بنانے کی ہدایت کی۔وزیراعلیٰ مریم نواز شریف نے کاروبار فنانس کے لیے ضرورت کے مطابق قرض کی فراہمی اورنئے یونٹ قائم کرنے والے کاروباری افراد کی حوصلہ افزائی کی ہدایت کی۔
بریفنگ میں بتایا گیا کہ قرض حاصل کرنے والوں میں ٹرانسپورٹ، فارما سوٹیکل اور چھوٹے کاروبار کرنے والے افراد شامل ہیں، کاروبار فنانس کے لیے 80 ہزار سے زائد افراد کی قرض کی درخواستیں منظور ہو چکی ہیں اور کاروبار فنانس اور کاروبار کارڈ کے ذریعے 34 ہزار کاروباری افراد کے لیے لون کا اجرا ہو چکا ہے۔
وزیراعلیٰ مریم نواز شریف نے قرض حاصل کرنے والے تمام افراد سے فیڈ بیک لینے کا حکم دیا،انہوں نے اجلاس کے دوران ہی قرض حاصل کرنے والے افراد سے فون پر بات چیت کی اور قرض کے حصول کے مراحل کے بارے میں دریافت کیا۔
