جنوبی کوریامیں شہریوں نےبینک ڈکیتی کی دلچسپ اور انوکھی واردات ناکام بناکرملزم کو گرفتارکرلیا۔پولیس کے مطابق ملزم بیروزگار ہے اور مالی مشکلات کا شکار ہے، اس نے ڈکیتی کے بعد فرار کی کوئی منصوبہ بندی نہیں کی تھی اور اس کے پاس کوئی سواری بھی نہیں تھی۔
تفصیلات کے مطابق جنوبی کوریا کے شہر بوسن کے ایک بینک میں سفری بیگ تھامے ایک شخص داخل ہواجس نے چہرے پر نقاب لگا رکھا تھا اور کیپ بھی پہن رکھی تھی۔کیشیئر کاؤنٹر کے قریب جا کر ملزم نے بیگ سے ایک چیز نکالی جو کہ سیاہ رنگ کے تھیلے میں لپٹی ہوئی تھی، اس نے چلا کر سب کو خبردار کیا کہ اس کے پاس اسلحہ ہے، سب زمین پر لیٹ جائیں ۔ ملزم نے کیشیئر کو دھمکا کر مطالبہ کیا کہ اس کے بیگ میں نقدی بھرے۔اس دوران بینک میں متعدد کسٹمر موجود تھے جو غیر متوقع صورتحال سے خوفزدہ ہوگئے اور بعض نے شور شرابا شروع کردیا۔
اس دوران ایک شخص نے ملزم کو دبوچ لیا جس میں دیگر لوگوں نے بھی اس کی مدد کی۔جب پولیس پہنچی تو اس نے ملزم کو ہتھکڑی لگائی، اس دوران اس کے سیاہ رنگ کے تھیلے کو چیک کیا گیا تو اس میں سے ایک ڈائناسور کے ڈیزائن والی پانی کی کھلونا پستول نکلی جسے دیکھ کر وہاں موجود سب لوگوں کی ہنسی چھوٹ گئی۔
