وزیراعظم محمد شہباز شریف نے کہا ہے کہ پاکستان کی معیشت پر قرضوں کا بوجھ کم کرنے کے لیے قومی آمدن میں اضافہ ناگزیر ہے۔ انہوں نے ایف بی آر ہیڈ کوارٹرز کے دورے کے دوران ایف بی آر پرفارمنس مینجمنٹ سسٹم کی افتتاحی تقریب سے خطاب کرتے ہوئے کہا کہ ڈیجیٹائزیشن کے ذریعے ایف بی آر کو جدید خطوط پر استوار کیا جا رہا ہے، اور اس اہم سفر میں تمام رکاوٹیں دور کرنا ہوں گی۔
وزیراعظم نے کہا کہ گزشتہ سال کی نسبت ٹیکس محصولات میں 27 فیصد اضافہ قابل ستائش ہے، تاہم کھربوں روپے کے زیر التواء ٹیکس کیسز کے جلد فیصلے ضروری ہیں تاکہ قومی خزانے کو فائدہ ہو۔ انہوں نے کہا کہ ہمیں ماضی کی غلطیوں سے سبق سیکھتے ہوئے تیزی سے اصلاحات کی جانب بڑھنا ہوگا۔
وزیراعظم نے کہا کہ پاکستان کو قرضوں کی دلدل سے نکالنے کے لیے اپنی آمدن میں اضافہ کرنا ہوگا اور اس کے لیے ہر ممکن اقدام کیا جائے گا۔ انہوں نے کہا کہ ملک کی ترقی کے لیے شبانہ روز محنت کی ضرورت ہے، اور ہمیں اپنی صلاحیتوں پر انحصار کرتے ہوئے خود انحصاری کی راہ اپنانا ہوگی۔
