پاک افغان سرحد سے گرفتار دہشت گرد شریف اللہ ورجینیاعدالت میں پیش۔ٹرمپ نے اس کی گرفتاری پر پاکستان کا شکریہ اداکیاتھا
شریف اللہ ان دو ملزمان میں سے ایک ہے جو کابل حملے میں ملوث ہیں۔امریکی حکام
افغان سرحد سے گرفتار دہشت گرد شریف اللہ کو ورجینیا کی عدالت میں پیش کردیا گیاہے۔واضح رہے کہ دو روزقبل امریکی صدرٹرمپ نے اس کی گرفتاری پرباقاعدہ پاکستان کا شکریہ اداکیاتھا۔ امریکا کے حوالے کیے گئے داعش دہشت گرد شریف اللہ کو ورجینیا کی عدالت میں ابتدائی سماعت کے لیے پیش کردیا گیاہے۔محمد شریف اللہ کو ورجینیا کی وفاقی عدالت میں جج ولیم پورٹر کے سامنے پانچ مارچ کی دوپہر پیش کیا گیا اور اسے نیلے رنگ کا جیل میں پہننے والا لباس پہنایا گیا تھا۔دس منٹ تک جاری ابتدائی سماعت کے موقع پر شریف اللہ کو بتایا گیا کہ الزامات ثابت ہوئے تو اسے عمر قید کا سامنا ہوگا، افغان شہری شریف اللہ نے جج سے بات کیلئے دری زبان کے مترجم کی خدمات لیں۔اس موقع پر اٹارنی نے بتایا کہ ملزم کے پاس اثاثے نہیں اس لیے فیڈرل پبلک ڈیفنڈر درکار ہے۔امریکی حکام کا کہنا ہےکہ شریف اللہ ان دو ملزمان میں سے ایک ہے جو کابل حملے میں ملوث ہیں۔امریکہ کی جانب سے ابتدائی سماعت کے موقع پر شریف اللہ کی تصویر بھی جاری کردی گئی ہے۔
