23مارچ ،تاریخ کا اہم ترین دن۔درپیش سنگین مسائل سے پوری طرح آگاہ ہیں،متحد ہو کر تمام رکاوٹیں عبور کر لیں گے۔صدرمملکت اور وزیراعظم کاپیغام

صدر مملکت آصف علی زرداری اور وزیراعظم شہباز شریف نے پاکستانیوں کو مبارک باد دیتے ہوئے پیغام دیا کہ 23مارچ ہماری تاریخ کا ایک اہم دن ہے، پاکستان کو درپیش سنگین مسائل سے پوری طرح آگاہ ہیں اور ہم متحد ہو کر تمام رکاوٹوں کوعبور کر لیں گے۔یوم پاکستان پر اپنے خصوصی پیغام میں صدر آصف علی زرداری نے کہا ہے کہ یقین ہے کہ ہم متحد ہو کر تمام رکاوٹوں کوعبور کر لیں گے، پوری قوم جمہوریت، انصاف اور مساوات کیلئے اپنے عزم کا اعادہ کرے۔انہوں نے کہا کہ ہم کشم یریوں کو ہر قسم کی اخلاقی اور سفارتی مدد فراہم کرنے کیلئے پر عزم ہیں۔آصف زرداری نے کہا کہ آج ہی کے دن قرارداد پاکستان منظور ہوئی،23مارچ1940کوایک عظیم قوم اور آزادوطن کی بنیاد رکھی گئی۔انہوں نے کہا کہ آزادی سے لیکر اب تک ہم نے مختلف شعبوں میں نمایاں کامیابیاں حاصل کیں۔ مسلح افواج،سول انتظامیہ،پولیس نے ہماری قوم کی حفاظت،سلامتی اورخودمختاری کویقینی بنایا۔وزیراعظم شہباز نے اپنے پیغام میں کہا کہ 23مارچ ہماری تاریخ کا ایک اہم دن ہے، ہمارے بزرگوں کی مسلسل جدوجہد کے باعث علیحدہ وطن کا قیام ممکن ہوا۔ 14 اگست 1947کو پاکستان دنیا کے نقشے پر ایک آزاد ملک کے طور پر ابھرا۔انہوں نے کہا کہ لاکھوں مسلمانوں نے ہندوستان میں اپنے گھر بار چھوڑ کر پاکستان ہجرت کرنے کا فیصلہ کیا۔شہباز شریف نے کہا کہ بحیثیت قوم غیرمعمولی حالات کا مقابلہ کرتے ہوئے ثابت قدمی کا مظاہرہ کرنا ہے، مربوط پالیسی اصلاحات کے فریم ورک کے ساتھ پاکستان کو مضبوط معیشت بنائیں گے۔