کمانڈر پاکستان نیوی فلیٹ ریئر ایڈمرل عبدالمنیب نے امن مشق اور امن ڈائیلاگ کی تفصیلات سے آگاہ کرتے ہوئےکہاہے کہ پاک بحریہ کے زیر انتظام کثیرالقومی بحری مشق امن کا 9واں ایڈیشن7 سے11 فروری تک ہوگا۔ مسلح افواج کے شعبہ تعلقات عامہ آئی ایس پی آر کے مطابق 60 سے زائد ممالک امن مشق 2025 میں شرکت کر رہے ہیں۔آئی ایس پی آر کے مطابق ہاربر فیز 7 سے 9 فروری تک منعقد ہوگا، اس میں بحری امور سے متعلق سیمینارز، آپریشنل مظاہرے، بین الاقوامی ثقافتی اور کھیلوں کی سرگرمیاں شامل ہیں۔سی فیز کا انعقاد 10 سے 11 فروری تک ہوگا، سی فیز میں انسدادِ بحری قزاقی اور انسداد دہشت گردی کی مشقیں شامل ہوں گی، سرچ اینڈ ریسکیو آپریشنز، لائیو فائرنگ اور بین الاقوامی فلیٹ ریویو بھی ہوگا۔ پاک بحریہ مشق امن 2025 کے ساتھ پہلی بار “امن ڈائیلاگ” کا آغاز بھی کررہی ہے، امن ڈائیلاگ میں دنیا بھر سے بحری افواج اور کوسٹ گارڈز کے سربراہان شریک ہوں گے۔
