وزیراعلیٰ پنجاب مریم نواز نے پہلے مرحلے میں زرعی ٹیوب ویل کی سولرائزیشن جون تک مکمل کرنے کا ہدف مقرر کر دیا۔
مریم نواز نے زرعی ٹیوب ویل کی سولرائزیشن پراجیکٹ کا افتتاح کر دیا،منصوبے کی قرعہ اندازی کے دوران اٹک کے رہائشی محمد نواز کا پہلا نام نکلا۔
قرعہ اندازی کے ذریعے پہلے مرحلے میں پنجاب بھر میں 8 ہزار ٹیوب ویل شمسی توانائی پر منتقل کیے جائیں گے،عام کاشت کار کو سولر ٹیوب ویل سے اوسط روزانہ 10 ہزار سے زائد اور ماہانہ سوا تین لاکھ روپے سے زائد بچت ہو گی،حکومت زرعی ٹیوب ویل کیلئے 10کلو واٹ کے سولر سسٹم کیلئے 5لاکھ سبسڈی دے گی۔
15کلوواٹ سولر سسٹم کیلئے ساڑھے 7 لاکھ اور20 کلو واٹ سولر سسٹم کیلئے 10لاکھ روپے سبسڈی دی جائے گی،قرعہ اندازی میں کامیاب کاشتکار متعلقہ ضلع کے وینڈر کا انتخاب کر کے سولر سسٹم کی تنصیب کرائیں گے۔
پنجاب میں چیف منسٹر زرعی ٹیوب ویل سولرائزیشن پراجیکٹ کیلئے 5 لاکھ30 ہزار سے زائد کاشتکاروں نے اپلائی کیا جن میں 3 لاکھ 85ہزار کاشتکار قرعہ اندازی کے اہل قرار پائے،87فیصد ڈیزل پر چلنے والے زرعی ٹیوب ویل اور13فیصد بجلی سے چلنے والے زرعی ٹیوب ویل شمسی توانائی پر منتقل ہوں گے۔
وزیراعلیٰ پنجاب کا کہنا تھا کہ زرعی ٹیوب ویل کی سولرائزیشن کا منصوبہ کاشتکاری میں انقلاب لائے گا،زرعی ٹیوب ویل کی سولرائزیشن سے فصل کی پیداواری لاگت میں نمایاں کمی آئے گی اور کاشتکار خوشحال ہو گا۔
مریم نواز نے کہا کہ کسان کارڈ،ایگریکلچرمیکائزیشن اور ایگری انٹرن شپ سمیت ہر پراجیکٹ کاشتکار کیلئے آسانیاں لا رہے ہیں۔
